I'm Game திரை விமர்சனம்

 

துல்கர் சல்மான் நடிப்பில், நஹாஸ் ஹிதாயத் இயக்கத்தில் வெளியாகியுள்ள திரைப்படம் 'ஐ எம் கேம்' (I'm Game).

பணக்கார வீட்டுப் பிள்ளையான டான் ஜான் (துல்கர் சல்மான்), தனது தந்தையின் விருப்பப்படி நிறுவனத்தை நடத்தினாலும், அவனது முழு கவனமும் சூதாட்டத்தின் மீதே இருக்கிறது. இதனால் பெரும் கடனாளியாக மாறும் அவனது வாழ்வில் ஒரு விபரீதம் நடக்கிறது. அதன்பின் அவனுக்கு ஒரு கை மாற்று அறுவை சிகிச்சை (Hand Transplant) செய்யப்படுகிறது. அந்த புதிய கைக்கு என்று ஒரு தனி ஃப்ளாஷ்பேக் மற்றும் நோக்கம் இருக்கிறது. கிரிக்கெட் சூதாட்ட சாம்ராஜ்யத்தை நடத்தும் டேவிட் ஆபிரகாம் (மிஷ்கின்) என்பவனுடன் டான் ஜான் எப்படி மோதுகிறான், அந்த ஆபத்துகளில் இருந்து எப்படி தப்பிக்கிறான் என்பதே படத்தின் மீதிக்கதை.

நெகட்டிவ் ஷேட்ஸ் கலந்த, சூதாட்ட வெறி பிடித்த ஒரு திமிரான இளைஞன் கதாபாத்திரத்தில் துல்கர் சல்மான் தனது ஒற்றை ஆளுமையால் படத்தை தாங்கிப் பிடிக்கிறார்.  விக்கி என்ற கதாபாத்திரத்தில் வரும் ஆண்டனி வர்கீஸ் பல இடங்களில் ஸ்கோர் செய்கிறார். கதாநாயகி காயடு லோஹர். கொஞ்சம் சின்ன கதாபாத்திரமாக இருந்தாலும் அவரது அழகால் நம்மை சுண்டி இழுக்கிறார். முக்கியமான கதாபாத்திரத்தில் அந்தோணி வர்கீஸ் பெப்பே அவருக்கு கொடுக்கப்பட்ட கதாபாத்திரத்தை கச்சிதமாக செய்துள்ளார். கதிர் கிளைமாக்ஸ் காட்சியில் ஸ்கோர் செய்கிறார். மிரட்டல் வில்லனாக மிஷ்கின் அவரது மிகைப்படுத்தட்ட நடிப்பால் கதையின் ஓட்டத்திற்கு பலம் சேர்த்துள்ளார். சம்யுக்தா விஸ்வநாதன் நல்ல நடிப்பை பதிவு செய்துள்ளார்.

ஜெக்ஸ் பிஜாயின் அதிரடியான பின்னணி இசை மற்றும் ஜிம்ஷி காலீதின் நியான் விளக்குகள் நிறைந்த சூதாட்ட அரங்குகளைக் காட்டும் ஒளிப்பதிவு படத்திற்குப் பெரும் பலம்.

இயக்குநர் நஹாஸ் ஹிதாயத் கடந்த சில ஆண்டுகளாக தேசத்தையே அடிமையாக்கி வைத்திருந்த சூதாட்டத்தின் பின்னணியில் ஒரு கதையை சொல்லியிருக்கிறார். கூடவே ஒரு ஃபேண்டசி விஷயத்தை படத்துக்குள் கொண்டு வந்தது அருமை. முதல் பாதி முழுக்க திரில்லர் பாணியில் விறுவிறுப்பாகவும், புதுமையாகவும் கொண்டு செல்கிறார். இரண்டாம் பாதியில் எமோஷன் கலந்த ஒரு பழிவாங்கும் ஆக்ஷன் கதையாக மாற்றுகிறார். ஒரு நல்ல ஆக்ஷன் த்ரில்லர் படத்தை ரசிகர்களுக்கு தந்திருக்கிறார் நிச்சயம் ஒரு முறை பார்க்கலாம்.