தமிழ் திரையுலகில் தனக்கென ஒரு அடையாளத்தை உருவாக்க வேண்டும் என்ற கனவுடன் பயணித்து வரும் இளம் நடிகர் அஜித் விக்னேஷ், தற்போது வெளியாகியுள்ள ‘பிளாக் கோல்டு’ திரைப்படத்தின் மூலம் ரசிகர்கள் மற்றும் திரையுலகினரின் கவனத்தை ஈர்த்துள்ளார். இப்படத்தில் வில்லனாக நடித்துள்ள அவர், கதாநாயகனுக்கு இணையான முக்கியத்துவம் கொண்ட கதாபாத்திரத்தில் தனது தனித்துவமான நடிப்பை வெளிப்படுத்தி பாராட்டுகளைப் பெற்று வருகிறார். குறிப்பாக, திரையில் அவரது தோற்றமும் நடிப்பும் ரசிகர்களின் கவனத்தை வெகுவாக ஈர்த்துள்ளன.

மதுரையைச் சேர்ந்த அஜித் விக்னேஷுக்கு கல்லூரிப் பருவத்தில் இருந்தே சினிமா மீது ஆர்வம் ஏற்பட்டுள்ளது. சென்னையில் உள்ள ஸ்ரீ சாய்ராம் பொறியியல் கல்லூரியில் சிவில் இன்ஜினியரிங் படிப்பை முடித்த அவர், தனது சினிமா கனவை நனவாக்குவதற்காகத் திரைத்துறையில் பயணிக்கத் தொடங்கினார். நடிப்புடன் சிலம்பம், பாக்ஸிங் உள்ளிட்ட தற்காப்புக் கலைகளிலும் பயிற்சி பெற்றதுடன், நடிப்புப் பயிற்சியையும் முறையாக மேற்கொண்டார். தொடக்கத்தில் கிடைத்த சிறிய வாய்ப்புகளையும் தயக்கமின்றி ஏற்றுக்கொண்டு, தனது திறமையை நிரூபிக்கத் தொடர்ந்து முயற்சி செய்தார். இதன் தொடர்ச்சியாக இதுவரை 40 முதல் 50-க்கும் மேற்பட்ட குறும்படங்களில் நடித்துள்ளார்.

குறும்படங்களில் தனது நடிப்புத் திறனை வளர்த்துக்கொண்ட அஜித் விக்னேஷுக்கு, விஜய் நடிப்பில் வெளியான ‘பிகில்’ திரைப்படத்தில் நடிக்கும் வாய்ப்பு கிடைத்தது. மறைந்த நடிகர் விவேக் அவர்கள் மூலமாகக் கிடைத்த அந்த வாய்ப்பு, அவரது திரைப்பயணத்தில் முக்கியமான தொடக்கமாக அமைந்தது. அஜித் விக்னேஷின் நடிப்பைப் பார்த்துப் பாராட்டிய விவேக், அவருக்குப் ‘பிகில்’ படத்தில் நடிக்கும் வாய்ப்பைப் பெற்றுக் கொடுத்துள்ளார். தொடர்ந்து ‘தமிழ் ராக்கர்ஸ்’ இணையத் தொடரிலும் நடித்த அவர், தற்போது ‘பிளாக் கோல்ட்’ திரைப்படத்தின் மூலம் வலுவான கதாபாத்திரத்தில் தனது இருப்பைப் பதிவு செய்துள்ளார். ‘பிகில்’ படத்தில் அவரது நடிப்பைப் பாராட்டிய இயக்குநர் வெற்றிமாறனின் வார்த்தைகளும் தனக்கு மிகப்பெரிய ஊக்கமாக அமைந்ததாகக் கூறுகிறார்.

தனது திரைப்பயணம் குறித்து அஜித் விக்னேஷ் கூறுகையில், “கல்லூரிப் பருவத்தில் இருந்தே சினிமா மீது எனக்கு ஆர்வம் இருந்தது. அதற்காகத்தான் சென்னைக்கு வந்தேன். திரைத்துறையில் ஆரம்பத்தில் சிறிய வாய்ப்புகள் கிடைத்தாலும் அவற்றை மகிழ்ச்சியுடன் ஏற்றுக்கொண்டு, ஒவ்வொரு வாய்ப்பிலும் சிறப்பாகச் செயல்பட வேண்டும் என்று நினைத்தேன். அதனால்தான் குறும்படங்களில் நடிக்கத் தொடங்கினேன். அதன் பிறகு மறைந்த நடிகர் விவேக் சார் மூலமாக ‘பிகில்’ படத்தில் நடிக்கும் வாய்ப்பு கிடைத்தது. எனது நடிப்பைப் பார்த்துப் பாராட்டி அந்த வாய்ப்பைப் பெற்றுக் கொடுத்தார். அந்தப் படத்தில் எனது நடிப்பை வெற்றிமாறன் சார் பாராட்டியதும் மிகப்பெரிய ஊக்கத்தைக் கொடுத்தது. ‘பிகில்’ படத்தில் தொடங்கிய எனது திரைப்பயணம், ‘தமிழ் ராக்கர்ஸ்’ தொடரைத் தொடர்ந்து இப்போது ‘பிளாக் கோல்ட்’ படத்தின் மூலம் அடுத்த கட்டத்தை எட்டியுள்ளது. பலரும் என்னைப் பார்த்து அடையாளம் கண்டு பாராட்டுவது மிகுந்த மகிழ்ச்சியைத் தருகிறது” என்றார்.

மேலும், “திரைத்துறையில் இன்னும் பல சிறப்பான கதாபாத்திரங்களில் நடித்து எனக்கென ஒரு தனித்துவமான இடத்தை உருவாக்க வேண்டும் என்பதே எனது விருப்பம். தற்போது கதாநாயகனாக இரண்டு திரைப்படங்களில் நடிக்க ஒப்பந்தமாகியுள்ளேன். அந்தப் படங்கள் குறித்த அதிகாரப்பூர்வ அறிவிப்புகள் விரைவில் வெளியாகும். எந்த மாதிரியான கதாபாத்திரமாக இருந்தாலும் அதற்கேற்ப என்னைத் தயார்படுத்திக்கொண்டு நடிக்கத் தயாராக இருக்கிறேன். நல்ல கதைகளையும், சவாலான கதாபாத்திரங்களையும் எதிர்பார்த்துக் காத்திருக்கிறேன்” என்று தெரிவித்துள்ளார்.

குறும்படங்களில் தொடங்கி, ‘பிகில்’, ‘தமிழ் ராக்கர்ஸ்’, ‘பிளாக் கோல்டு’ எனப் படிப்படியாகத் தனது பயணத்தை விரிவுபடுத்தி வரும் அஜித் விக்னேஷ், தற்போது கதாநாயகனாகவும் புதிய அத்தியாயத்தைத் தொடங்கத் தயாராகியுள்ளார். வில்லன் கதாபாத்திரத்தில் கவனம் ஈர்த்துள்ள இவர், அடுத்ததாக ஹீரோவாக எந்த மாதிரியான கதைகளில் நடிக்கப் போகிறார் என்ற எதிர்பார்ப்பு உருவாகியுள்ளது. தனது விடாமுயற்சியாலும் நடிப்புத் திறமையாலும் திரையுலகில் தனக்கான இடத்தைப் பிடிக்கப் பயணிக்கும் அஜித் விக்னேஷின் அடுத்தடுத்த படங்கள் குறித்த அறிவிப்புகள் விரைவில் வெளியாக உள்ளன.

 

கலையரசன், ஆனந்தி, ஆஷ்னா சவேரி, காளி வெங்கட், காயத்ரி, ராகவ் விஜய் ஆகியோர் நடிப்பில், அறிமுக இயக்குநர் எம். ஜானகிராமன் இயக்கத்தில் வெளியாகியுள்ள திரைப்படம் 'டைட்டானிக்' 

படத்தின் கதைப்படி, ராகவ் விஜய் மாலை நடக்கும் தனது திருமணத்துக்காக சென்னையிலிருந்து பெங்களூருவுக்கு ரயிலில் செல்கிறார். அந்த பயணத்தில் கலையரசன், காளி வெங்கட் ஆகிய இருவரையும் சந்திக்க, மூன்று பேரும் பேசிப் பேசி நண்பர்களாக மாறுகிறார்கள். அவர்களின் காதல் வாழக்கையை ஒவ்வொருவரும் பகிர்ந்து கொள்கிறார்கள். திருமணத்திற்கு தயாராக இருக்கும் ராகவ் விஜய், காதல் தோல்வியின் நினைவுகளுடன் வாழும் கலையரசன், காதலில் ஏமாற்றங்களை சந்தித்த பின் திருமணம் செய்து கொண்டு செட்டிலான காளி வெங்கட் ஆகிய இந்த மூவரின் நட்பும், அதன் பின் அவர்கள் வாழ்க்கையில் நடக்கும் சம்பவங்களுமே மீதிக்கதை.

கலையரசன், ஆனந்தி மற்றும் காளி வெங்கட் ஆகியோரின் இயல்பான நடிப்பு படத்திற்குப் பெரிய பலம் சேர்த்துள்ளது. குறிப்பாக காளி வெங்கட்டின் நகைச்சுவைக் காட்சிகள் ரசிக்கும்படி உள்ளன. ராகவ் விஜய் இந்த இரண்டு அனுபவ நடிகர்களுக்கு இணையாக ஈடு கொடுத்து நடித்திருக்கிறார். கெஸ்ட் ரோலில் ஆஷ்னா சவேரி, காயத்ரி, பாலாஜி மோகன் ஆகியோரும் ரசிக்க வைக்கிறார்கள். மதுமிதா, தேவதர்ஷினி உள்ளிட்ட மற்ற நடிகர்களும் படத்திற்கு வலு சேர்க்கின்றனர்.

நிவாஸ் கே. பிரசன்னாவின் இசை பாடல்கள் மற்றும் பின்னணி இசை காதல் காட்சிகளுக்குப் பொருத்தமாக அமைந்துள்ளன. பாலு ஒளிப்பதிவில் ரயில் பயண காட்சிகளும், ஊட்டி, கோயமுத்தூர் காட்சிகளும் கலர்ஃபுல்லாக ரசிக்க வைக்கிறது. 

இயக்குநர் எம். ஜானகிராமன், முதல் படத்திலேயே மூன்று வெவ்வேறு காதல் அனுபவங்களை ஒரே பயணத்தின் வழியாக இணைக்க முயற்சி செய்திருக்கிறார். அதை ரொமாண்டி காமெடி படமாக சொல்லியிருப்பது இன்னும் ரசிக்கும்படி அமைந்துள்ளது. நிச்சயம் ஒரு முறை தியேட்டரில் போய் பார்க்கலாம்.

 

இயக்குநர் சந்தோஷ் தவாகர் இயக்கத்தில், 2027 ஆஸ்கர் விருதுக்கான இந்தியாவின் அதிகாரப்பூர்வப் பரிந்துரையாகத் தேர்ந்தெடுக்கப்பட்ட திரைப்படம் கோந்தல் (Gondhal).

மகாராஷ்டிராவின் கிராமம் ஒன்றில் புதுமணத் தம்பதியருக்காக இரவு முழுவதும் நடைபெறும் 'கோந்தல்' என்ற பாரம்பரியச் சடங்கைச் சுற்றிகதை நகர்கிறது. ஆனந்த் என்ற வசதியான குடும்பத்தை சேர்ந்த இளைஞரைத் திருமணம் செய்யும் சுமனுக்கு, அந்த வாழ்க்கையில் விருப்பமில்லை. அவளது மனம் சஹிபா என்ற நாட்டுப்புறக் கலைஞரிடம் இருக்கிறது. இதற்கிடையில் சர்ஜே ராவ் என்ற ஊர்த் தலைவரின் மகனுக்கும் சுமன் மீது தீராத ஆசை இருக்கிறது. தனது வாழ்க்கையைத் தானே தீர்மானிக்க நினைக்கும் சுமன், சர்ஜேராவின் பலவீனத்தையும் சடங்கு மீதான அவனது ஈடுபாட்டையும் பயன்படுத்தி தான் விரும்பிய வாழ்க்கையை அடைய திட்டமிடுகிறாள். அவள் திட்டம் நிறைவேறியதா? அந்த மனிதர்கள் ஒவ்வொருவரின் நிஜ முகம் என்ன? என்பதை ஒரு இரவில் நடைபெறும் சம்பவங்கள் மூலம் சொல்வதே இந்த ‘கோந்தல்'.

கிஷோர் கடம், இஷிதா தேஷ்முக் மற்றும் யோகேஷ் சோஹோனி ஆகியோர் தங்கள் கதாபாத்திரங்களுக்கு உயிர் கொடுத்துள்ளனர். சர்ஜே ராவாக நிஷாத் போயர் கவனம் ஈர்க்கின்றனர். அதிகார மமதையும், நாயகி மீதான ஆசையும் அவர் கண்களாலேயே வெளிப்படுத்துகிறார். சுரேஷ் விஸ்வகர்மாவின் நடிப்பும் கதாபாத்திரத்திற்கு வலுசேர்க்கிறது. படத்தில் நடித்த அத்தனை பேருமே குறையில்லாத நிறைவான நடிப்பை வழங்கியுள்ளனர்.

 

மூத்த ஒளிப்பதிவாளர் அமலேந்து சௌத்ரியின் ஒளிப்பதிவு படத்திற்குப் பெரிய பலம். குறிப்பாக, படத்தின் ஆரம்பத்தில் வரும் சுமார் 25 முதல் 30 நிமிடங்கள் கொண்ட சிங்கிள்-ஷாட் (One-take shot) காட்சி சர்வதேசத் தரத்தில் படமாக்கப்பட்டுள்ளது. இசைஞானி இளையராஜாவின் பின்னணி இசை மற்றும் கிராமிய வாத்தியங்களின் தாளம் படத்தின் மிகப்பெரிய பலம்.

இயக்குநர் சந்தோஷ் தாவக்கர், மகாராஷ்ட்ராவின் பாரம்பரிய சடங்கை வெறும் பின்னணியாக மட்டும் பயன்படுத்தாமல், அதையே கதையை நகர்த்தும் முக்கியமான அம்சங்களாக மாற்றியிருக்கிறார். ஆரம்பத்தில் வரும் சிங்கிள் ஷாட் காட்சியிலேயே ஒரு சில கதாபாத்திரங்களையும் அந்தச் சமூகத்தின் அதிகார அமைப்பையும் மிகச் சிறப்பாக நமக்கு அறிமுகம் செய்து விடுகிறார். 

வழக்கமான மசாலா படங்களைத் தாண்டி, அழுத்தமான திரைக்கதை மற்றும் கலைநயம் மிக்க திரில்லர் படங்களை விரும்புவோருக்கு 'கோந்தல்' ஒரு சிறந்த அனுபவமாக இருக்கும்.

 

இந்திய மக்கள் தொடர்பு கழகத்தின் (PRSI) சென்னை கிளை சார்பில், கோரமண்டல் இன்டர்நேஷனல் லிமிடெட் (Coromandel International Limited) நிறுவனத்தின் ஆதரவுடன், உணவுப் பாதுகாப்பு குறித்த "1-நிமிட பொதுச் சேவை அறிவிப்பு (PSA) வீடியோ போட்டி" சென்னை மயிலாப்பூரில் உள்ள ஹோட்டல் சவேராவில் இன்று (நவம்பர் 13) வெற்றிகரமாக நடைபெற்றது.

​"உணவைச் சேமிப்போம் – வீணாக்குவதைத் தவிர்ப்போம், சிறப்பாக வாழ்வோம்" (Save Food – Waste Less, Live Better) என்ற மையக்கருத்தில், இளம் தகவல் தொடர்பாளர்களிடையே உணவுப் பாதுகாப்பு குறித்த விழிப்புணர்வை ஏற்படுத்தவும், சமூக மாற்றத்தை ஊக்குவிக்கவும் இப்போட்டி நடத்தப்பட்டது.

​இவ்விழாவில், கோரமண்டல் இன்டர்நேஷனல் லிமிடெட் நிறுவனத்தின் கார்ப்பரேட் கம்யூனிகேஷன் மற்றும் மார்க்கெட்டிங் பிரிவுத் தலைவர் (AVP & Head) திரு. தினேஷ் குமார் சிறப்பு அழைப்பாளராகக் கலந்து கொண்டு சிறப்புரையாற்றினார். "சிந்திப்போம், படைப்போம், பேசுவோம்!" (Think, Create, Speak!) என்ற வாசகத்தின் கீழ் நடைபெற்ற இப்போட்டியில், தமிழகம் முழுவதிலுமிருந்து ஏராளமான மாணவர்கள் ஆர்வத்துடன் பங்கேற்றுத் தங்களது படைப்புகளைச் சமர்ப்பித்தனர்.

​போட்டியில் சமர்ப்பிக்கப்பட்ட படைப்புகள் நடுவர்களால் மதிப்பீடு செய்யப்பட்டு, வெற்றி பெற்றவர்களுக்குப் பரிசுகள் அறிவிக்கப்பட்டன:

​முதல் பரிசு (ரூ. 25,000): செல்வி. எஸ். தேஜஸ்வினி, காட்சித் தொடர்பியல் துறை (Department of Visual Communication), சத்யபாமா அறிவியல் மற்றும் தொழில்நுட்ப நிறுவனம், சென்னை.

​இரண்டாம் பரிசு (ரூ. 15,000): திரு. எஃப். கிராஸ் ஷெரூன் (Cross Sheroon. F), காட்சித் தொடர்பியல் துறை, வேல்ஸ் அறிவியல், தொழில்நுட்பம் மற்றும் உயர்கல்வி நிறுவனம் (VISTAS), சென்னை.

​மூன்றாம் பரிசு (ரூ. 10,000): திரு. ஆர். இர்பான், காட்சித் தொடர்பியல் துறை, ஜமால் முகமது கல்லூரி, திருச்சிராப்பள்ளி.

​பி.ஆர்.எஸ்.ஐ (PRSI) சென்னை கிளையின் தலைவரும், சென்னை வேல்ஸ் அறிவியல், தொழில்நுட்பம் மற்றும் உயர்கல்வி நிறுவனத்தின் காட்சித் தொடர்பியல் துறை இணைப் பேராசிரியருமான டாக்டர் என். ராஜா இவ்விழாவிற்குத் தலைமை தாங்கி, வெற்றி பெற்ற மாணவர்களுக்குப் பாராட்டுச் சான்றிதழ்களையும் ரொக்கப் பரிசுகளையும் வழங்கிக் கௌரவித்தார். இந்நிகழ்விற்கு கோரமண்டல் இன்டர்நேஷனல் லிமிடெட் நிறுவனம் அனுசரணை வழங்கியிருந்தது.

 

கண்ணன் ரவி குழுமம் (Kannan Ravi Group) சார்பில் தயாரிப்பாளர் கண்ணன் ரவி தயாரிப்பில், தீபக் ரவி இணைத் தயாரிப்பில் உருவாகும் புதிய திரைப்படத்திற்கு ‘செங்குலம்’ எனப் பெயரிடப்பட்டுள்ளது. கவுதம் ராம் கார்த்திக் கதாநாயகனாக நடிக்கும் இப்படத்தின் டைட்டில் போஸ்டர் மற்றும் கிளிம்ப்ஸ் வீடியோவைப் படக்குழு அதிகாரப்பூர்வமாக வெளியிட்டுள்ளது. வித்தியாசமான உருவாக்கத்துடன் வெளியாகியுள்ள இந்த அறிவிப்பு ரசிகர்கள் மற்றும் திரையுலகினர் மத்தியில் கவனம் பெற்று வருகிறது.

கண்ணன் ரவி குழுமம் தொடர்ந்து வித்தியாசமான கதைக்களங்களைக் கொண்ட திரைப்படங்களைப் பிரம்மாண்டமான பொருட்செலவில் தயாரித்து வருவதுடன், புதிய திறமையாளர்களுக்கும் வாய்ப்பளித்து வருகிறது. அந்த வகையில், அறிமுக இயக்குநர் சின்னசாமி பொன்னையா திரைக்கதை மற்றும் வசனம் எழுதி இயக்கும் இப்படத்திற்கு யுவன் சங்கர் ராஜா இசையமைக்கிறார். 

டைட்டில் போஸ்டரில், ரத்தம் தேய்ந்த வேல்கம்பு, அதைச் சுற்றியுள்ள சிவப்பு நிறத் துணிகள் மற்றும் கரிசல்மண், புழுதி, இரத்தம் எனப் படத்தின் ‘செங்குலம்’ என்ற தலைப்புக்கு ஏற்ற வகையில் அதிரடியான தோற்றம் இடம்பெற்றுள்ளது.

இதனைத் தொடர்ந்து வெளியாகியுள்ள கிளிம்ப்ஸ் வீடியோவில், கரிசல் காட்டின் மண்ணில் ஒரு சிவப்பு நிற வளையல் வைக்கப்பட்டிருக்கிறது. அப்போது ரத்தம் தோய்ந்த வேல்கம்பு ஒன்று வேகமாகப் பாய்ந்து வந்து அந்த வளையலைத் தாக்கி உடைத்துச் சிதறடிக்கிறது. அதைத் தொடர்ந்து, அந்தச் சிதறல்களுக்கு மத்தியில் ‘செங்குலம்’ என்ற படத்தின் தலைப்பு வெடித்துத் தோன்றுகிறது. அந்த இடத்தைச் சுற்றிலும் காணப்படும் கால்தடங்கள், செருப்புத் தடங்கள் என ஒவ்வொன்றும் ஆர்வத்தையும்  ஆச்சரியத்தையும் ஏற்படுத்தும் வகையில் அமைந்துள்ளன. அதிரடியான காட்சியமைப்புடன் வெளியாகியுள்ள இந்த கிளிம்ப்ஸ் படத்தின் மீதான எதிர்பார்ப்பை அதிகரித்துள்ளது.

இப்படத்திற்கு  கிஃப்ட்சன் ராபர்ட் ஒளிப்பதிவு செய்துள்ளார். R. மோகன் மற்றும் வைர பாலன் கலை இயக்குநர்களாகப் பணியாற்றியுள்ளனர். தமிழ் அரசன் படத்தொகுப்பு பணிகளை கவனிக்க, ஹெட் ஆப் ஆப்ரேஷன்ஸ் ஆக ஶ்ரீநாத் விஸ்வநாதன் பணியாற்றுகிறார். மகேஷ் மேத்யூ சண்டைப் பயிற்சி இயக்குநராகவும், மோனிக் போஸ்டர் வடிவமைப்பாளராகவும் பணியாற்றியுள்ளனர்.

இப்படத்தின் படப்பிடிப்பு கோவில்பட்டியில் தொடங்கி, தூத்துக்குடி, திருநெல்வேலி, தென்காசி, தேனி, பொள்ளாச்சி உள்ளிட்ட தமிழகத்தின் பல்வேறு பகுதிகளிலும், காஷ்மீரிலும் படப்பிடிப்பு நடைபெற்று வருகிறது. மேலும் தமிழ், தெலுங்கு, மலையாளம், கன்னடம் , இந்தி என ஐந்து மொழிகளில் இப்படம் 2027-ம் ஆண்டு வெளியாகும் என அறிவிக்கப்பட்டுள்ளது.

 

நடிகர் ஷாருக்கான் நடிப்பில் பெரும் எதிர்பார்ப்பை ஏற்படுத்தியுள்ள ‘கிங்’ (King) திரைப்படத்தின் “து மில் ஜாயே” (Tu Mil Jaaye) பாடல், ஆர்மேக்ஸ் ஹார்ட்பீட்ஸ் (Ormax Heartbeats) வெளியிட்டுள்ள வாராந்திர டாப் 5 பாடல்கள் பட்டியலில் முதலிடத்தைப் பிடித்துள்ளது. ரசிகர்கள் மத்தியில் இந்தப் பாடல் பெரும் வரவேற்பைப் பெற்று வருவதுடன், சமூக வலைதளங்களிலும் தொடர்ந்து டிரெண்டாகி வருகிறது.

இன்ஸ்டாகிராமில் இந்தப் பாடலின் ஹுக் ஸ்டெப்பை ரசிகர்கள் பலரும் ரீல்ஸ்களாக உருவாக்கிப் பகிர்ந்து வருகின்றனர். மேலும், பல்வேறு இசை ஸ்ட்ரீமிங் தளங்களிலும் இப்பாடல் கவனம் ஈர்த்து வருகிறது.

‘கிங்’ திரைப்படத்தில் ஷாருக்கான் மற்றும் தீபிகா படுகோன் இணைந்து நடித்துள்ள “து மில் ஜாயே” (Tu Mil Jaaye) பாடல், இருவரின் அசத்தலான கெமிஸ்ட்ரி, மனதை வருடும் இசை மற்றும் கண்கவர் காட்சிகள் ஆகியவற்றால் ரசிகர்களைக் கவர்ந்துள்ளது. இருவரும் மீண்டும் இணைந்து திரையில் தோன்றுவது ரசிகர்களிடையே கூடுதல் உற்சாகத்தை ஏற்படுத்தியுள்ளது.

“து மில் ஜாயே” (Tu Mil Jaaye) பாடல் தரவரிசையில் முதலிடத்தைப் பிடித்து தொடர்ந்து ரசிகர்களின் வரவேற்பைப் பெற்று வருவதால், ‘கிங்’ திரைப்படத்தின் மீதான எதிர்பார்ப்பும் நாளுக்கு நாள் அதிகரித்து வருகிறது. ஷாருக்கானை மீண்டும் பெரிய திரையில் காண ரசிகர்கள் ஆவலுடன் காத்திருக்கின்றனர்.

சித்தார்த் ஆனந்த் இயக்கத்தில் ஷாருக்கான் நடிப்பில் உருவாகியுள்ள ‘கிங்’ திரைப்படம், வரும் டிசம்பர் 24, 2026 அன்று திரையரங்குகளில் வெளியாகவுள்ளது.

 

'கே.டி' (K.D.) படத்தை இயக்கிய மதுமிதா சுந்தரராமன் இயக்கத்தில், அர்ஜுன் தாஸ் முதல்முறையாகக் காவல்துறை அதிகாரியாக நடித்துள்ள திரைப்படம் ‘ஜான் டோ’ (John Doe). 

தமிழகத்தின் மலை கிராமம் ஒன்றிற்கு ஸ்ருஷ்டி தன் டீனேஜ் மகள், 8 வயது மகன் உடன் வந்து குடியேறுகிறார். 8 வயது மகன் ஒரு நாள் திடீரென காணாமல் போகிறான். இந்த வழக்கை விசாரிக்கத் துவங்கிகிறார் காவல் துறை அதிகாரி சஞ்சனா நடராஜன். ஆரம்பத்தில் சாதாரணமாக Missing case-ஆக தோன்றும் இந்தச் சம்பவத்தின் பின்னணியில் அதிர்ச்சியூட்டும் மர்மங்கள் இருப்பதைக் கண்டறிகின்றனர். மறுபுறம் அர்ஜூன் தாஸ் ஒரு கார் விபத்து குறித்த ஒரு வழக்கை விசாரிக்க துவங்குகிறார். அது பல குழந்தைகளின் மாயம் & தொடர் கொலைகளுடன் தொடர்புடையதாக மாறுகிறது. இந்த இரண்டு வழக்குகளும் ஒரு புள்ளியில் இணைய, அர்ஜூன் தாஸூம் சஞ்சனாவும் இணைந்து வழக்கை முடிக்க முயற்சிக்கிறார்கள். அந்த வழக்கை முடித்தார்களா? யார் இந்த சம்பவங்களுக்கு பின்னணியில் இருக்கும் நபர்? என்பதே இந்த “ஜான் டோ" படத்தின் கதை.

கேரள போலீஸ் அதிகாரியாக அர்ஜுன் தாஸ் கச்சிதமாகப் பொருந்தியுள்ளார். தமிழகக் காவல்துறை அதிகாரியாக சஞ்சனா நடராஜன் கம்பீரமான நடிப்பையும், உளவியல் நிபுணராக கார்த்திக் குமார். இரண்டு குழந்தைகளுக்கு தாயாக தர்ஷனா கதாபாத்திரத்தில் ஸ்ருஷ்டி சிறப்பான நடிப்பை வெளிப்படுத்தியிருக்கிறார். ஜாரா வினீத் சந்தோக் முதல் படத்திலேயே குறிப்பிடத்தக்க ஒரு நடிப்பை வழங்கியிருக்கிறார். ஜெயபிரகாஷ், அனுபமா குமார், அர்ச்சனா சந்தோக், கார்த்திக் குமார், படவா கோபி ஆகியோரும் சில காட்சிகள் வந்தாலும் படத்தில் பெரிய தாக்கத்தை ஏற்படுத்தி விட்டு செல்கிறார்கள்.

ப்ரீத்தா ஜெயராமனின் ஒளிப்பதிவு மலைப்பகுதிகள் மற்றும் நீருக்கடியில் எடுக்கப்பட்ட காட்சிகளில் த்ரில்லர் உணர்வைக் கூட்டுகிறது. முஜீப் மஜீத் மற்றும் ஆர்டிஸ்ட் 404 ஆகியோரின் பின்னணி இசை கதையின் விறுவிறுப்புக்குப் பக்கபலமாக அமைந்துள்ளது. இரண்டு வெவ்வேறு இடங்களில் நடக்கும் விசாரணைகளைக் குழப்பமில்லாமல் விஜய் வெங்கடரமணன் நேர்த்தியாகத் தொகுத்துள்ளார்.

 காணாமல் போகும் குழந்தைகள் அதை தொடர்ந்து நிகழும் தொடர் கொலைகள், காவல்துறை விசாரணை, அதிகாரியின் மனப் போராட்டம் என பல அடுக்குகளை கொண்ட கதையை உளவியல் ரீதியில் மிக சுவாரஸ்யமாக அணுகியிருக்கிறார் இயக்குனர் மதுமிதா.

வழக்கமான கமர்ஷியல் சினிமாக்களைத் தாண்டி, மலையாளத் திரைப்பட பாணியிலான, உணர்வுப்பூர்வமான க்ரைம் த்ரில்லர்களை விரும்புபவர்களுக்கு ‘ஜான் டோ’ ஒரு சிறந்த படம்

 

Movietron Production தயாரிப்பில் உருவாகியுள்ள ‘அறிவு’ திரைப்படம், கோவாவில் நடைபெறவுள்ள 57-வது இந்திய சர்வதேச திரைப்பட விழாவில் (57th International Film Festival of India – IFFI 2026), இந்தியன் பனோரமா ‘New Horizons’ பிரிவில் திரையிடத் தேர்வு செய்யப்பட்டுள்ளது. இதன் மூலம், உலக அளவில் கவனம் பெறும் இந்திய சர்வதேச திரைப்பட விழாவில் திரையிடத் தேர்வாகியுள்ள தமிழ் திரைப்படம் என்ற பெருமையை ‘அறிவு’ பெற்றுள்ளது.

சாய்வினோத் ஜெயக்குமார் தயாரிப்பில், ‘கழுகு’ திரைப்படம் மூலம் கவனம் ஈர்த்த இயக்குநர் சத்யசிவா இயக்கத்தில் உருவாகியுள்ள இப்படத்தில், ‘உறியடி’ விஜய்குமார் மற்றும் கயல் ஆனந்தி ஆகியோர் முதன்மைக் கதாபாத்திரங்களில் நடித்துள்ளனர். பெண் உரிமைகள் மற்றும் சமூகத்தில் பெண்கள் எதிர்கொள்ளும் பிரச்சினைகளை மையமாகக் கொண்டு, வலுவான சமூகச் செய்தியுடன் இப்படம் உருவாக்கப்பட்டுள்ளது. சமூக அக்கறையுடன் கூடிய கருத்துகளை விறுவிறுப்பான சினிமா மொழியில் சொல்லும் படைப்பாக ‘அறிவு’ உருவாகியுள்ளது. இப்படத்தின் இணைத் தயாரிப்பாளராக சாய்பிரபு ஜெயக்குமார் செயல்படுகிறார். 

‘அறிவு’ திரைப்படத்தில் I. M. விஜயன், சிங்கம்புலி, தீபா சங்கர் உள்ளிட்ட பலரும் முக்கிய கதாபாத்திரங்களில் நடித்துள்ளனர். D. இமான் இப்படத்திற்கு இசையமைத்துள்ளார். ஒளிப்பதிவை தில் ராஜு மேற்கொண்டுள்ளார். படத்தொகுப்பை வெற்றி கிருஷ்ணன் கவனித்துள்ளார். கலை இயக்குநராக S.K. பணியாற்றியுள்ளார். ராமு M. தயாரிப்பு மேற்பார்வையாளராகவும், அரவிந்த் நிர்வாகத் தயாரிப்பாளராகவும், தென்னரசு தயாரிப்பு நிர்வாகியாகவும் பணியாற்றுகின்றனர். 

படம் வெளியாவதற்கு முன்பே இந்திய சர்வதேச திரைப்பட விழாவில் திரையிடத் தேர்வாகியிருப்பது ‘அறிவு’ திரைப்படத்திற்கு சர்வதேச அளவில் கிடைத்துள்ள முக்கியமான அங்கீகாரமாகும். மேலும், பல்வேறு சர்வதேச திரைப்பட விழாக்களுக்கும் இப்படத்தை அனுப்ப படக்குழு திட்டமிட்டுள்ளது. இதன் மூலம், திரையரங்குகளில் வெளியாகும் முன்பே உலகத் திரைப்பட அரங்கில் தனது பயணத்தைத் தொடங்கியுள்ளது ‘அறிவு’.

பெண்ணுரிமை உள்ளிட்ட சமூக முக்கியத்துவம் வாய்ந்த கருத்துகளை மையமாகக் கொண்டு உருவாகியுள்ள இப்படம், சர்வதேச திரைப்பட விழாவில் பெற்றுள்ள அங்கீகாரத்துடன் ரசிகர்கள் மத்தியிலும் எதிர்பார்ப்பை உருவாக்கியுள்ளது.

உலகத் திரைப்பட விழாவில் கிடைத்துள்ள இந்த அங்கீகாரத்துடன், Movietron Production நிறுவனத்தின் தயாரிப்பில் இயக்குநர் சத்யசிவா இயக்கியுள்ள ‘அறிவு’ திரைப்படம் வரும் டிசம்பர் 11-ம் தேதி உலகம் முழுவதும் திரையரங்குகளில் வெளியாகிறது.