இருமுடி திரை விமர்சனம்

 

நடிகர் ரவி தேஜா நடிப்பில், இயக்குனர் சிவா நிர்வாணா இயக்கத்தில் வெளியாகியிருக்கும் திரைப்படம் இருமுடி / இருமுடி கட்டு).

மத்தியதர வர்க்கத்துத் தந்தையான திரிநாத் (ரவி தேஜா), தன் மகள் மற்றும் குடும்பத்தின் மீது அளவுகடந்த பாசம் கொண்டவர். குடிப்பழக்கம் உள்ளவரான இவர், ஒவ்வொரு ஆண்டும் சபரிமலைக்கு ஐயப்ப மாலை அணியும்போது முற்றிலும் சாதுவான, ஆன்மீகவாதியாக மாறுகிறார். அதே சமயம், அவர் வாழும் கிராமத்தில் பள்ளி மாணவிகளுக்கு எதிரான பாலியல் அநீதிகளும், மர்மக் கொலைகளும் அரங்கேறுகின்றன. ஆன்மீகப் பயணத்தில் இருக்கும் ஒரு தந்தை, தன் மகளையும் ஊர் பெண் குழந்தைகளையும் காக்க எவ்வாறு போராடுகிறார், குற்றவாளிகளை எப்படிக் கண்டுபிடிக்கிறார் என்பதே படத்தின் முக்கியக் கதை.

நாயகன் ரவி தேஜாவின் எதார்த்தமான நடிப்பு படத்திற்குப் பெரும் பலமாக அமைந்துள்ளது. வழக்கமான மாஸ் ஹீரோ இமேஜை தள்ளி வைத்து விட்டு மகள் பாசத்துக்காக என்ன வேணாலும் செய்யும் ஒரு சாதாரண மனிதராக, அதே சமயம் தப்பு நடந்தால் தட்டிக் கேட்பவராகவும் நடித்திருக்கிறார். ரவி தேஜாவின் மனைவியாக பிரியா பவானி சங்கர். ஒரு குழந்தைக்கு அம்மாவாக நேர்த்தியான நடிப்பை வெளிப்படுத்தியுள்ளார். ரவி தேஜாவின் மகளாக நடித்திருக்கும் பேபி நக்ஷத்ரா, தனது கள்ளமில்லா மற்றும் அப்பாவியான நடிப்பால் படத்தின் ஆன்மாவாகத் திகழ்கிறார். சாய் குமார் மிக முக்கியமான கதாபாத்திரத்தில் குருசாமியாக அழுத்தமான நடிப்பை வழங்கியிருக்கிறார். ஸ்வாசிகா இதுவரை பார்க்காத ஒரு நெகடிவான கதாபாத்திரத்தில் மிரட்டியிருக்கிறார்.

ஜி.வி. பிரகாஷின் பாடல்களும், பின்னணி இசையும் படத்துக்கும், த்ரில்லர் காட்சிகளுக்கும் பெரும் பலம் சேர்க்கின்றன. விஷ்ணு சர்மாவின் ஒளிப்பதிவு படத்தின் மிகப்பெரிய பலம். அந்த இயற்கை எழில் கொஞ்சும் ஊரை நமக்கு விருந்தாக்குகிறார். பிரவீன் புடியின் படத்தொகுப்பு கச்சிதம்.

இயக்குனர் சிவா நிர்வாணா ஏற்கனவே மஜிலி போன்ற படங்களில் எமோஷனல் ட்ராமாவை அழகாக கையாண்டிருப்பார். இந்த படத்திலும் ஒரு அழகான ஃபேமிலி ட்ராமாவை பக்தி கலந்து முக்கியமான பெண்கள் பாதுகாப்பு பிரச்சினைகளையும் சிறப்பாக பேசியிருக்கிறார். இருமுடி கட்டு என்பது வழக்கமான தெலுங்கு மசாலா படம் போல இல்லாமல், ஒரு அழுத்தமான  உணர்வைத் தருகிறது. மகள்களைப் பெற்ற தந்தையர்களும், குடும்பப் பார்வையாளர்களும் கண்டிப்பாகத் திரையரங்கில் பார்க்க வேண்டிய படம்.