பெத்தலேகம் குடும்ப யூனிட் திரை விமர்சனம்

 

கருகாட்டி என்ற கிராமத்தில் வசித்து வரும் ஜஸ்டின் (நிவின் பாலி), அந்தப் பகுதியில் கேட்டரிங் தொழில் செய்து கொண்டு, ஊர் மக்களுக்கு எந்த உதவி என்றாலும் ஓடி வரும் ஒரு பொறுப்பான நபர். சமூகத்தின் வழக்கமான திருமண வயதைத் தாண்டியும் அவர் இன்னும் திருமணம் செய்துகொள்ளாமல் இருக்கிறார். இந்நிலையில், குடிப் பழக்கம் உள்ள ஒரு பொறுப்பற்ற தந்தையின் மகளான ஆஷ்லி (மமிதா பைஜூ) தன் குடும்பத்துடன் அந்த ஊருக்குக் குடிவருகிறார். தனது குடும்பச் சூழலால் மனவேதனையில் இருக்கும் ஆஷ்லிக்கு, ஜஸ்டினின் அன்பான மற்றும் பொறுப்பான குணத்தைப் பார்த்ததும் அவர் மீது காதல் மலர்கிறது. ஆரம்பத்தில் இந்த வயது வித்தியாசக் காதலை ஜஸ்டின் ஏற்க மறுத்தாலும், ஆஷ்லியின் சுட்டித்தனமும் அன்பும் அவரை மாற்றுகிறது. இவர்களின் காதலைச் சுற்றியுள்ள உலகம் எப்படிப் பார்க்கிறது, அதன் பிறகு என்ன நடக்கிறது என்பதை நகைச்சுவையுடனும் எதார்த்தத்துடனும் விவரிக்கிறது மீதிக்கதை.

காதல் தோல்வி, இளம்பெண்ணின் குறும்புத்தனத்தால் வெட்கப்படுவது, நடுத்தர வயதுக்கேற்ற உடல்மொழி எனப் பல உணர்ச்சிகளைத் தனது தேர்ந்த நடிப்பால் வெளிப்படுத்தி படத்திற்குப் பெரும் பலமாக அமைந்துள்ளார் நிவின் பாலி. ஆஷ்லி பாத்திரத்தில் வரும் மமிதா பைஜூ, படம் முழுக்கத் தனது வழக்கமான சுட்டித்தனத்தாலும் துருதுருப்பான நடிப்பாலும் ரசிகர்களைக் கவர்கிறார்.  சங்கீத் பிரதாப், சுரேஷ் கிருஷ்ணா, ஷியாம் மோகன், வினய் ஃபோர்ட் என அனைவரும் தங்களுக்குக் கொடுக்கப்பட்ட கதாபாத்திரங்களைச் செவ்வனே செய்துள்ளனர்.

விஷ்ணு விஜய்யின் பாடல்களும் பின்னணி இசையும் படத்திற்கு மிகப்பெரிய பலம். ஒளிப்பதிவாளர் அஜ்மல் சாபுவின் கேமரா கோணங்களால் படத்தின் அத்தனை ஃபிரேம்களும் அழகாகியிருக்கிறது.

இயக்குநர் கிரிஷ் ஏ.டி. அன்றாட வாழ்வில் நடக்கும் எளிய மனிதர்களின் இயல்பான நகைச்சுவையைத் திரைக்கதையாக்குவதில் மீண்டும் முத்திரை பதித்துள்ளார். படத்தில் வரும் ஒற்றை வரி வசனங்கள் வெடிச் சிரிப்பை வரவழைக்கின்றன.

பெத்லகேம் குடும்ப யூனிட் எந்தவொரு ஆரவாரமும் இன்றி, எளிய மனிதர்களின் உணர்வுகளையும், ஒரு அழகான காதலையும் மிக நேர்த்தியாகப் பேசும் ஒரு கலகலப்பான ஃபீல்-குட் திரைப்படம்.